文／劉靜娟

去附近買熟菜，一位太太行到我身軀邊，講：「你這領褲花了足媠，是佗一間百貨公司買的？」

我講：「毋是，城中市場買的。」閣補充，「真濟年前買的，這陣，應當無矣。」

這領棉料的褲闊闊，好穿，當初我就是佮意伊的花草有現代感，敢若無仝色水的布拼出來的。

一遍，我等車的時，也拄（tú，遇見）著一位小姐問我縖（hâ，繫）的絲仔巾佗位買的？我講人相送，伊佇印度買的。伊真失望，共查埔朋友講：「我無可能去印度買啊。」

我共伊建議，「城中市場有兩間賣印度、尼泊爾衫的店，你會當去看覓。」

我彼條絲仔巾有五六色的橫巡（線條），佮衫好佮，我不時縖。不過，伊準做去印度，嘛無可能買會著。

因為佇新生報上班，較捷佇附近城中市場出入，退休了後，也捌去過，兩遍報生份人買物件的所在拄好也是遐。

30外年前我去印度旅行，佇Varanasi的自由時間，和旅行團拄仔（tú-á，才）熟似的阿芬予旅館外口一位印度人招去買絲仔巾。伊講近近仔，啥知影愈行愈偏僻，行甲阮膽膽起來。最後行到一間織絲仔工場；伊■（tshuā，帶）阮入去一个房間，共門關起來。我驚惶，問伊哪著關門？伊講外口觀光客行來行去。觀光客行來行去哪有需要關門？共阮兩人關起來較好「刣」（敲詐）？甚至搶？佇一个生疏閣散赤的國家，總是較驚。

出國前，朋友聽講我無招朋友、家己一个人欲去印度旅行，講我哪變遐好膽？我講毋是家己一个人，是參加旅行團。

彼陣，予印度人關起來，心肝怦怦喘。印度人皮膚烏，目睭也烏閣深，看著就小可驚，毋知伊咧想啥。

面前有一堆絲仔料和絲仔巾，我共阿芬講有伴，免驚，趕緊買，趕緊離開；伊也細聲應我，無佮意嘛愛買，毋通空手出去。閣有，皮包拍開的時愛較細膩。

佇四蕊目睭的「監視」下，我買兩塊絲仔料和四條絲仔巾。行出織絲仔工場，阿芬講我拄才面青恂恂，伊家己嘛流一身軀凊汗。

轉去旅社，仝團的人有的佇大廳開講、耍牌仔，有的去泅水，完全是太平盛世；阮煞親像對另外一个世界歷險轉來。

好佳哉有驚無險，後來阮一路看著的絲仔巾攏比佇遐買的較貴。

一塊絲仔料，綠色和紅色的幼花，後來提去做一領洋裝，配一條敢若犁牛骨刻的紅色袚鍊，逐家攏呵咾。袚鍊是佇西門町共一位中東來的人買的。彼个年代，路邊時常有這款民族風的物件。

這陣，予人問絲仔巾佗位買的，煞「牽」出30外年前旅行的經驗。