文／劉靜娟

久長以來，我攏用塑膠材質的砧，雖然知影彼毋是對健康上好的選擇；毋過，輕，好用；俗（便宜），用一段時間，就會當換新的。

彼日，佇花蓮林田山林業文化園區參觀，看檜木日式宿舍建築、大型檜木藝術木雕，運材鐵道和火車；看各種鋸木和做木工的器具，攏感覺真親切。因為，阮老爸捌和朋友做伙佇南投水裡坑（水里鄉）經營過木材行，和木材的因緣真深；我兩个阿姊出嫁的時，爸爸家己攢（tshuân，準備）柴料，畫設計圖，請師傅來厝內做嫁粧。大姊這陣講起，猶會講伊的梳妝台、冊桌、衫櫥是烏心石、檜木，抑是雞柳木做的。

林田山園區真大，彼日天氣也誠好，阮踅踅（se̍h，逛）看看，有時就坐落來曝日頭。後來經過一排賣物件的小店，我倚去看，少年查某店員介紹各種木製產品，水果盤、會嘓嘓叫的水雞（青蛙）等等。箸上輕，上實用，伊講：「這是台灣檜木做的。」我就按呢買一束。

紲落去（suà--lo̍h-khì，接下來），伊鼓吹我買砧，講是烏心石的。

看起來是有品質的砧，毋過我嫌重，煮菜傷食力。伊講好柴砧毋但好切菜切肉，袂傷著刀；也袂起砧屑仔砧幼仔；買轉去，用油拭三遍保養，就會當用足久；砧一面切生的食物，另外一面切熟菜；免像塑膠砧，愛另外用一塊……

伊喙水好，也講甲真誠懇；我當咧躊躇的時，阮後生講：「買啦，買啦，伊台語講甲遮爾（tsiah-nī，這麼）媠！」

確實，二十出頭歲的查某囡仔，講遐濟話，無插一句華語，一半句台語閣是我毋捌聽過的，可見伊的台語「字庫」真豐富。我笑笑仔共阮囝講：「所以，做生理愛gâu（擅）講台語。」

彼个砧用無幾工，我就真滿意。我的氣力提伊無問題；佇柴砧頂頭切菜，手感較好，食材也較袂滑。閣有人講柴砧會當吸收切菜時的反作用力，減輕手骨的負擔呢。

不過，我上佮意的是切、剁食材時tok tok的聲；塑膠砧無這款聲勢。無論細聲、重聲的tok tok，聽起來若專業師傅的手路，也予我聯想著華語成語「咄咄逼人」和「咄咄怪事」。（毋知我是咧逼啥人、看著啥怪事？）