文／劉靜娟

最近有一个小新聞，一對大學生相招去動物園，查埔提醒查某朋友愛紮（tsah，攜帶）學生證，因為學生的入場券會當省30箍；結果予查某學生反感，兩人起冤家，舞甲欲分手。

網友有人講省錢真正常，女學生可能本來就無想欲繼續行，揣（tshuē，找）理由來扯（tshé，分手）；有人講交女朋友遐爾（hiah-nī，那麼）菝仔屎（小氣），莫怪予人嫌。

我嘛有一遍為著省30箍懊惱的經驗。兩年前，阮小妹的外孫Franz來台北𨑨迌（thit-thô，遊玩），伊講伊kan-na（只）細漢的時去過紐約的動物園，想欲看台北動物園的獅。伊自五六歲以後，大部分的時間攏蹛（tuà，住）佇外國，阮看著伊的機會真少；所以，伊的三姨婆和四姨婆就歡歡喜喜tshuā（帶）伊去木柵動物園。買票的時，我看告示寫18歲以下抑是本國在校學生，有優待，半價30箍。伊毋是本國在校學生，毋過，伊猶未18歲；賣票的講愛本國籍才會使。四姨婆，我的小妹跤手緊，隨買全票。我當咧怪伊，Franz講伊有比利時和台灣兩種國籍啊。我講愛有證件，伊講伊有紮護照。我哪知影伊的小包內底除了iPad，也有護照。

我越頭欲去換票，阮小妹講才30箍，莫費氣、了時間啦！三个人隨入去動物園。

後來，我一路懊惱無去換票，這毋是30箍的問題，我是盡量想欲予Franz會記得家己台灣人的身分；計較的過程也是一種教育。♣