那工真暗啊，阮大家攏地睏，汝才轉來，目睭拔金，看汝面色無好，甘哪足累，心裡真毋甘，想欲甲汝安慰，毋知欲按開嘴，翻身想欲擱睏，聽汝細聲講：恁咧睏未？二兄偷偷翻一下身，大姊面向壁，弟弟手掩佇嘴裡，我歸去藏佇棉被內，無人敢出聲，大家攏知影：「一定是有工課欲教阮作」。
 
看阮無人睬汝，汝擱講一擺：「敢無人精神？米甕仔無米，明啊載無米通好煮，恁誰人卡乖，去糴半斗米轉來……」外口hiah呢（那麼）寒，佇被底蓋燒燒，實在足無想欲起來，汝擱講：「明啊早起無早當通吃喔！」
 
大姊推二兄一下，二兄甲我踢腳，我偷偷捻弟弟兮屁股，三個人佇被內推過來拍過去，著是無人肯爬起來，汝看阮三個毋應聲，甘哪咧弄被獅，著自己咧吐大氣：「唉！做工課作甲這呢晚才轉來，教恁去糴一點啊米，著無人肯鬥相工……」
 
大家攏惦惦無敢講話，我聽著拍勢想欲起來，猶擱想著hiah呢寒，巷ㄚ口擱暗摸摸，我一個人嘛會驚，看ㄚ兄ㄚ姊擱咧假睏，心內躊躇不安，毋知欲暗怎，倒佇棉床攏無敢喘氣。
 
目睭瞇瞇，耳孔挖利利，一直咧聽汝兮動靜，聽汝吐一聲大氣、聽汝咧穿衫、聽汝去開門、聽汝兮腳步聲走對門外去，心內煩惱擱甘苦，感覺自己實在真不孝，乎汝這辛苦、乎汝這失望、乎汝這孤單──暗時兮巷仔，路燈毋知有光無？汝這呢累，走路毋知會拔倒無？阮無人睬汝，汝毋知會生氣無？這呢不識代誌、未曉體諒，汝悉心肝毋知會艱苦無？
 
真久、真久，才聽到汝開門轉來兮聲，聽汝提衫對浴間去，才想到，阮嘛無替汝準備燒水，汝ㄟ暗一定擱洗冷水，頭殼覓佇被內，雖然阮攏無講話，毋過無人睏也去……
 
代誌經過這濟年，汝仝款盡心晟養阮大漢，勞苦風霜攏過去，對汝兮忤逆甲錯誤，汝嘛攏無擱提起，但是，有一句話放佇心內，一直無講出嘴：
 
「啊母！失禮啦；那暗兮代誌，阮到即嘛猶毋敢放未記。」