樹阿站佇那〈hia〉個知有外久啊，邊阿無別叢樹阿，甘哪伊一不人，熱天時，伊雙手伸長長，通好乎人休涼，寒天時，身軀仝款站甲直直直，不管是霜來雪降，站乎正是伊兮堅持，無論風來雨來、日時暗時、照月娘、亦是出天星。

那個下午，伊甲查埔囝仔頭一擺見面，囝仔看著這呢大叢兮樹阿，笑甲足歡喜，隨時爬起伊兮身軀甲伊講話，樹阿趕緊甲手伸長長，乎囝仔休睏，囝仔定定來找樹阿開講，甲伊兮心事講乎樹阿聽，囝仔哪轉去，樹阿著會惦心內唱歌，一個人這呢久，總算有人來陪伴。

囝仔慢慢啊大漢，樹阿嘛感覺精神哪來哪歹，不過伊仝款逐工咧等待，等待囝仔來甲伊作伴，哪看到囝仔來，伊兮精神著好囉。這工，囝仔猶擱來啊，樹啊足歡喜，因為伊有足濟話想欲對囝仔講，囝仔今阿日無甲樹阿講話，伊身邊加一個查某囡仔，因兩個手牽手坐著樹阿腳，話哪講哪細聲，樹阿驚因熱，惦惦啊甲因招〈et〉風，不知安怎，心內感覺淡薄阿孤單。

真久、真久，囝仔攏無來啊，樹阿真思念伊，不知伊即嘛過了按怎？風，輕輕啊吹、雲，慢慢啊過，樹阿啊！問風、問雲、問對面兮山，攏無人會知影，不知這個囝仔是不是已經不記得這個所在，不記得這叢樹阿？樹阿一直等一直等，囝仔總算來啊，樹阿歡喜甲不知欲按怎，囝仔甲查某囡仔擱手牽手，兩人站佇樹阿面前，足認真足認真對樹阿講：「對即嘛開始，我欲一世人甲汝坐伙，絕對無欲分開……」樹阿聽著足感動，話煞講不出來。這時，囝仔提一支刀啊，開始佇樹阿兮身軀刻圖，囝仔真出力；一刀一刀割，割出兩粒心兮形狀……割甲一身兮汗。

樹阿真疼……真疼，想欲哭，擱因敢哭出聲，為著這個囝仔，伊甘願忍受皮肉兮痛疼，只要囝仔了解伊兮心情〈恁敢也當麥離開我？〉，心刻好啊，因兩人擱坐佇樹阿腳，話哪講哪細聲，樹阿仝款惦惦啊甲地招風，樹葉阿一葉一葉，輕輕啊落佇樹阿腳，這叢傷心兮老樹阿啊，偷偷啊吐大氣，足細聲……足……細……聲……

聽講：樹阿有另外一個名，呼作「媽媽」！