文／劉靜娟

干樂（陀螺）是我後生的高中同學，伊和阮囝仝款是彼種成績無啥好、意見真濟、予老師頭痛的學生；是in（他們）的家長三不五時會予教官「請」去談話的囡仔。按呢講較好聽，在我彼陣的感覺，是去聽訓。

一遍我閣去學校的時，拄（tú，遇）著干樂的媽媽；講起兩个狡怪囡仔，伊比我較開明，伊講：「十七、八歲的查埔囡仔，頭毛長，襪仔穿無仝色，根本毋是啥大代誌。」我講學生總是愛守規矩，服裝整齊；尤其無應當和老師應喙應舌（頂嘴），而且，去外口跳舞……

伊講：「也毋是去做太保，攑刀和人相刣。」

伊可能比我較倖（sīng，寵）囝，有時後生講學校的規定無啥道理的時，我準做無奈，嘛kan-na（只）會曉講「既然佇彼个體制內底，就愛照按呢做啊。」

我講我家己做學生的時，看著教官就閃；這陣用家長的身分來聽教官講家己的囡仔犯規，人就矮一半。

干樂的媽媽講：「驚啥，小小仔的尉官爾爾！」

彼暗，我講起教官講的話，也講我和干樂的媽媽的對話；講伊真有氣魄。

阮囝講：「伊將官看濟矣，當然無共少尉看在眼內啊。」紲落去（suà--lo̍h-khì，接下來）伊講：「干樂的爸爸是一粒星的，少將啊。」

會去想著遮的，因為今仔日看著關係干樂的報導，每遍佇電視抑是報紙看著伊的名出現，我會想，「伊這陣是有影響力的政治人物喔。」