上北行大肚橋，南落潦過濁水溪，中央是中央山脈，甲台灣分東西。
 
東西南北，有山有海，有林有溪，有迷人兮風景，有巧妙兮地勢，空氣好，名產嘛蓋濟，真萬幸兮是--即呢美麗兮台灣是咱兮。

台灣，呣是即嘛才出名，古早時代就有好名聲，荷蘭人講咱是FORMOSA，「美麗之島」佇外國嘛蓋時行。
 
花蓮兮海水青青青，橫貫公路是台灣人兮光榮；太魯閣、天祥是世界級兮好風景；蘇澳、礁溪兮溫泉有分燒甲冷。
 
台北出名是草山，溫泉好，櫻花水，通人攏知影。金山、野柳，閣有彼條水甲無塊講兮北海岸，來到遮，海湧會帶走所有兮煩惱，乎你心情歡喜閣快活。

來到新竹，米粉食煞，會記得去獅頭山。
 
台中東勢林場風景水，谷關出名是溫泉。
 
人彰化嘛有大佛、八卦山，前山水、後山闊，呣若夜景足迷人，逐年春天若到，南路鷹閣會飛來及咱作伴。

南投埔里是山城，風颱少，水質好，日月潭嘛人呵咾。
 
嘉義出名兮是阿里山，神木、日出是通人知。會山兮火車蓋厲害，山頂上水兮布景是雲海。
 
若是南部有曾文水庫、澄清湖、西子灣閣月世界。
 
枋寮、楓港海產是食通海；恆春台灣尾，風飛沙蓋厲害，白色的燈塔保庇船隻順風倒轉來。墾丁有長長兮海岸，國家公園內面環境上天然，佇這遊玩，消遙閣自在。

後山台東是台灣上清淨兮所在，太麻里火車頭，對面就會看著海，海風對面吹，舉頭看，天彼呢闊，山彼呢懸，雲彼呢溫柔，閣有彼呢水的海湧，任何人來到這，攏會深深感覺著，這才是號作人生。

愛爬山兮人攏知影，爬到玉山兮山頂，美麗兮景色攏佇目睭前，會感覺猶閣感動、猶閣榮幸。
 
雖然小小一粒「蕃薯仔子」，佇咱心中，是比天閣卡大。
 
敢是天公伯啊相疼痛，咱才會當佇遮站起，即呢濟兮人才，出即呢濟兮物件，即呢好兮水，即呢水的山，莫怪祖先欲相招伴、老仝幼，世傳世，一定欲佇遮住。

呣管地動有偌濟，無論風颱大水有幾個，千萬呣通無信心，互人看無目地，用真心甲伊疼痛，用真情相交陪，因為咱知影這個美麗兮台灣是咱兮。