那一工，濛濛阿雨地落，西湖邊煙霧茫茫，湖面是白兮、樹仔是白兮，船是白兮，連天，嘛是白兮，一個美麗兮女子，站佇湖邊，穿一領白衫，美麗兮面容，甲西湖兮天，照甲光炎炎，雨，漸漸細，霧，慢慢啊散。

小青陪佇伊身邊，兩人兮約定已經五百年，牽手走過兮路，有因所有痛苦甲歡喜兮記憶，修行兮路程雖然這呢遙遠，兩人作伴相依偎，總是有苦也有甜。今啊日是重要兮日子，那個人著欲出現佇西湖邊，久年兮心事從來無未記，這一工啊！因已經等一千年。

哪無那個人救伊一命，一千年前兮白蛇早著魂飛魄散，也無這時兮白素貞囉，千年來潛心修煉，一直記著當日恩情，仰望也當全心報答，真情真意，也只有小青了解甲支持，因等待兮人敢也知影這款兮心意？

船頂相見、借傘、還傘、定盟，促成一段才子佳人兮因緣，白素貞原為報恩來，想未到有這個美滿歸宿，「易求無價寶，難得有情郎。」既是月老來牽線，著望天來成全，但願甲伊結髮夫妻做到老。誰知平地起風颱，秘密天機是誰人來洩漏，為怎樣，法海和尚腳步隨時到？

為伊哀求為伊哭、為伊甲和尚鬥法水淹金山寺、為伊被迫吞落雄黃酒、為伊千里迢迢偷仙草，千年修行、幻化人形，只為當年一命之恩也當報甲夠，掠準翁婿一定知我用心，不是我賭強愛出頭，許仙啊許仙，汝無為夫妻兮情分，嘛著為咱兮後生許夢蛟，汝敢也記得？關佇雷峰塔兮，不是危害人間兮千年白蛇，是情深義重、溫柔善良兮白娘子──汝兮家後！

西湖兮水，猶原那呢水，湖面兮船，猶原來來去去，敢有一隻船，載著白素貞兮心情甲思念，千百年來，佇杭州西湖邊，對過路兮有緣人、對湖邊兮柳樹，對仝款兮落雨天，細聲咧講起：那當時，我甲小青，來到這，甲伊相見，如今船過水無痕，也歡喜，也傷悲，哪欲想起著那時兮情意，也只有佇這個，濛濛阿雨兮五月時……