文／劉靜娟

我佇一篇文章寫講二、三十年前，欲寫批去共人糾正看板錯誤的字，「撥工對電話簿查彼間公司的地址……」才忽然間想起，厝內足濟年無「電話簿」這个物件矣。

以前電信局逐年會送電話簿予電話用戶，一本幾若百頁，像磚仔遐爾（hiah-nī，那麼）厚，遐爾重；送來的時攏囥（khg，放）佇一樓，隨人去提。

彼陣，電話簿分類用無仝色的紙印，政府行政機關、國防機關、財稅單位、私人公司行號和一般住宅等等；順序用字畫濟少來排前後，方便逐家揣（tshuē，找）。

電話簿不三時會用著；有代誌欲問政府機關，電器用品欲修理，抑是欲揣各種行業，彼本簿仔就反（píng，翻閱）過來，反過去。若欲揣較近的，閣著繩（tsîn，定睛細看）一排一排細細字的地址。

新電話簿來，舊的有做生理的討去利用；內底的住址一條一條鉸起來，貼佇批囊（信封）頂頭，寄廣告單真方便。

彼陣，我也有家己的電話簿仔：細細本，方便囥佇皮包內底。有一本真特別，掀開若葵扇。

時代向前行，通信方式大大改變；這陣，莫講無公家大本的電話簿，一般人也無一定有細本的。慣勢用手機仔的，共電話號碼存佇內底；有Line的共伊準電話敲，方便也免錢。

甚至，有的人連室內電話也取消，免逐個月納錢。我前年嘛取消彼台傳真機的電話，規年迵天kan-na（只）傳過兩擺文件，曷著加了電話錢？♣