文／陳丕珍

早起時
白頭鵠仔就出來巡田園
飛過來閣飛過去
輕輕叫伊就起床

溪墘的山芙蓉
伸圇閣哈肺
伊沓沓仔開
一蕊閣一蕊

素潔的花蕊
開始抹胭脂
輕輕阿挲 慢慢阿抹
花蕊的色彩
千變閣萬化

手中的相機
撨過來閣撨過去
嘛無法度翕出妳的媠

河邊的牧草
搖過來閣搖過去
欣賞這款好景致
彎曲的花穗
親像目睭笑瞇瞇

花間中的蜜蜂
軁過來閣軁過去
滒尬歸身軀全粉味
欲佮花比誰較媠

免相爭！免相比！
恁攏是冬日的好滋味

黃昏時
桃紅色的花蕊
落尬滿滿是
一蕊閣一蕊
干若初生的孩兒
用抱巾包密密
恬恬趴在母親的搖籃
……繼續做夢