愛情來兮時，汝有偌快樂？

山為汝青、雲為汝飛、日頭為汝溫暖、月光為汝歸暝惦惦地笑，這呢歡喜兮汝，所有美麗兮心情，當然嘛是為著心裡意愛彼個人。

原來世間有這呢好看兮人，笑容彼呢迷人，五官彼呢端正，講話彼呢好聽，連伊照佇土腳兮形影，汝著金金看，足想足想，欲去甲伊行相偎。

汝偷偷阿佇心裡唱歌，有時想欲甲人講話，呣過大部份兮時間，汝甘願一個人行，汝開始問自己：我兮笑容伊敢會愛看？淡薄阿苦惱兮汝，只好定定去照鏡。

彼一工，恁兩人有見面，汝腳步輕鬆，感覺足有精神，轉來了後，不知怎樣睏抹落眠，天星啊！汝當也當甲我講：伊對我講兮彼句話，我敢好相信？伊有時呣講話，到底為著啥原因？

快樂兮日子哪也這呢緊過？一目暱，當初兮心情，哪也無地找；彼呢水兮記得，親像秋天兮落葉，隨風去飛；汝思慕兮情，恐驚是寒天兮雪---惦靜啊落落來……抹講話……

仝款兮山，抹擱再看，兮款兮雲，呣肯擱飛，日頭已經抹燒絡、月娘歹勢探頭，因為看汝傷心，伊嘛會呣甘目屎流，時常去兮彼條路，汝呣敢行腳到，仝款彼呢熟識兮路，是按怎，腳步沈重，先行，著行抹透？愛情來啊！汝猶擱歡喜猶擱驚，戀歌一首一首唱乎自己聽；愛情走啊！補抹滿兮是空虛失落兮心情，趕抹走兮是惦佇心頭兮形影。

癡情兮汝，也記得抬頭看：風咧吹、雲咧飛，著親像愛情會變化，有美麗兮心情；有幸福兮仰望，著算是世事無常、愛情來擱去，一定愛歡喜過日，乎自己抹孤單！