湖水是青兮，深兮青、淺兮青、遠兮青、近兮青，青甲透明透明、通光通光，湖頂面是富士山，湖內底嘛是富士山，大隻魚小隻魚，泅過山腳，富士山惦靜惦靜，甲因相對看。

行入去大門，兩邊是青翠兮樹仔，鳥隻佇地陪伊唱歌，後面兮山是兩隻大隻手，甲藍色兮天、白色兮雲、溫柔兮風，攏招入來至這住。春天兮花、秋天兮月、夏天兮風、冬天兮雪，攏佇這住過，因逐年相約束，時間那到，著愛來拜佛祖，做工課，順勢做主人招呼人客。

汝看！春天兮花，色水那（hih）呢濟，紅兮、白兮、粉兮、藍兮、紫兮、黃兮……景緻在畫。
 
秋天兮山，嘛真鬧熱，逐工胭脂水粉抹紅紅，愛水擱驚歹勢，熱天兮風透心涼，樹蔭真佻弄，挑工甲日頭覓相找，叫人緊來樹仔腳坐

寒天那來，逐工牽手作夥，遠遠兮富士山，面前兮本栖湖，攏靜靜咧等待，等待清氣、迷人、輕輕啊落來兮那場雪，無聲、無說。

敢有來過這款兮所在？三頓這呢澎湃，早時配花、配草、配雲，擱有清風來加菜；中晝配天、配山、配湖，鳥仔兮歌聲嘛也同齊來；晚頓配天星、配月娘、配樹影、配菩薩慈悲兮面容、耳邊傳來兮佛號，甲師父親切兮形影是上好兮款待。

清靜是伊兮名，花間樹影、湖光水色是伊唱乎伊兮歌聲，伊惦惦站佇那（hia），送汝出門、看汝離開、叫汝大步行，頭前兮路，擱卡遠嘛愛自己行，總有一工，汝自己著會知影；無論景色偌水，茫茫人海早晚著愛上岸，那（hit）兮時陣，會記得轉來，這有汝上深兮仰望，是汝心情安定兮靠山。

（丙戌年五日節日本本栖寺五日轉來，心內有深深兮思念，感謝那（hia）兮法師、菩薩甲一切有情……）