護士甲汝推到我面前時，汝猶地睏、面紅紅、皮皺皺、嘴闊闊、頭毛黑沉沉，眼睛瞇瞇、嘴翹翹、大家看著攏ㄜ老汝：那也這呢古錐？

汝真愛睏，不管時攏咧睏，暗時睏、日時睏、洗身軀時睏、喝牛奶時睏、人來睏、人走了繼續睏‧……睏甲足無閒，無時間通好哭，精神時嘛未哭，無伴時、腹肚餓、尿布濕攏未哭，哪有人甲汝相對向，汝著開始笑，輕輕叫汝兮名，汝著笑甲足歡喜，睏起來笑、笑煞著睏，著按呢，汝一暝大一吋，一暝大一吋‧……

ㄚ媽無甲意汝，嫌汝是查某囡仔，講汝皮膚黑，聲擱粗，嘴翹翹，親像見本櫥那個醜尪仔，佳哉！爸爸媽媽姊姊，厝邊隔壁同事、外公外媽阿舅阿衿阿姨姨丈甲因兮朋友，大家攏愛看醜尪仔，身軀肥肥、面啊膨膨、不時著笑嘻嘻，嘴翹翹？嘴翹翹才古錐咧。大家看汝笑、看汝爬、看汝坐看汝發牙，看你學行離腳手、擱看汝去幼稚園讀冊、看汝喔！愈來愈會講話。

春天兮風，一年一年吹，日子一工一工過，目一下暱，汝已經慢慢離開厝，離開阮兮身邊，講前途欲自己去打拚，人生兮理想愛自己去找，汝有真濟代誌想欲做，小漢兮時，汝講欲賣麵包、作怪手司機、有時想欲打跆拳，講按呢著會打贏姊姊。但是，自小漢看你學行、看汝學鐵馬、看汝騎機車、心內總是毋甘猶擱心驚驚，驚汝跋倒、驚汝疼，驚汝未曉越頭拐角，受傷吃虧是欲按怎？

如今，我坐佇車內，身邊是汝咧開車，面頭前是開闊兮大路，兩邊是青翠兮樹影，看汝開車自信擱輕鬆，我親像咧眠夢，敢有影美夢兮門已經開、人生兮道路汝挺好自己行？

敢有影──我兮醜尪仔已經大漢啊？