文／劉靜娟

十月底的強颱康芮共台北兩千外欉樹仔掃倒；這个報導，予我心情䆀*真久。

毋過，予我上毋甘的是附近麵店外口三欉菩提樹。

因為，出門攏會行過in邊仔，有時和蹛*隔壁巷的小妹相招去踅街，抑是去公園曝日頭，我若較先到，就會坐佇遐相等，欣賞菩提樹自由發展的樹箍、樹枝和佇風中飛過來反過去的葉仔；菩提樹葉仔較特別，心形，青翠金滑，牽一條長長的尾。

初初搬來這个社區的時，我就sannh著*路邊懸大的菩提樹。佇樹仔跤等公車，抑是坐佇車窗仔邊，經過「菩提樹路」，心情真好；有風的日子，佇厝內，聽著外口phiak phiak的聲，出來看，原來是菩提樹葉咧拍噗仔！

兩年後搬去巷仔內，猶是和菩提樹做厝邊，五、六月樹仔褪衫，我會想：閣是落葉仔的季節矣。第一遍看著In葉仔直直落，予我真緊張，明明毋是秋天，敢會是樹仔著蟲？Tsit-má，我一年一年看in落葉仔、看牽一條長尾的新穎自淺紅變做青翠，變做深綠，歡喜看自然的變化。

上捷看著的，就是倒去這三欉。

樹仔予風颱連根挽起來，是毋是塗無夠濟，根埋無夠深？毋知。

為著袂影響交通，市政府動作真緊，隨共樹箍鋸一節一節；看著樹仔的「身屍」，予人感覺一點仔悽慘！

過規個月，樹箍、樹枝才車走，賰本來「樹台」東倒西歪的紅磚仔和三窟塗。逐遍行過邊仔，心內想，市政府啥時陣會來補種新樹仔，敢也會種菩提樹？

這个時陣，小妹講伊有一寡塗毋知欲按怎處理，我叫伊趁這个機會倒佇這三窟內。是盆栽的塗，等於共添塗，毋是烏白倒廢塗，無犯法；對日後新種的樹仔也有貢獻。十外年前我就做過這款代誌。彼陣，我牽狗出來散步，會順紲提一塑膠袋仔的塗，倒佇大樹仔跤。過一陣，竟然發現兩三欉樹仔跤開真濟紅色的馬齒牡丹；我共花子綴*塗紮來矣！大樹仔跤開遐爾幼秀的花出來，敢若巨人的跤擦指甲油，足古錐，足心適！

講是按呢講，小妹一日拖過一日，並無提塗去擲；有一工卻共我講彼三窟補起來矣。

補種樹仔？毋是，補四角磚仔！

我驚一大趒，隨去看，三窟塗變做平平的紅磚仔路！只是比邊仔的較新；市政府共「毀屍滅跡」矣！麵店可能比我閣較鬰辛，彼三欉樹仔予店面加真有氣質啊！

十年樹木，補新樹仔，會慢慢仔大欉，敢毋是對待道路、對待植物較好的政策？風颱逐年會來，若逐遍予風颱吹倒的樹仔攏無欲補新的，kan-na鋪袂喘氣的磚仔，台北的人行道會變做啥光景？



䆀（bái）：醜，差
蹛（tuà）：住
Sannh著：愛上
綴（tuè）：跟