文／劉靜娟

同學內底，阿雲是上認真的；寫字、畫圖、篆刻、剪紙，無論做啥，伊攏像伊家己講的，「全力以赴」。學期結束「學員成果展」的時，伊的作品攏是上大件的。

伊講生四个查某囝了後，大家（婆婆）開明，喝停；阿媽講in（她）翁是大孫，應當愛有男丁，所以伊閣再「拚」兩个；結果猶是查某的。伊講：「袂使怪我，我『做人』嘛真認真啊！」六个查某囝媠、gâu（擅）讀冊，閣有好姻緣，莫怪伊講起來就春風滿面。

我和伊做伙上過的課是寫字，一遍伊交出一張全開的作品，18字×32行的《張遷碑》！Kan-na（只）想著算格仔、畫線，我就烏暗眩。問伊寫一張愛偌久？伊講六點鐘，交出來這張是第五張！在我的標準，伊已經是gâu人（能人）矣。

一遍書法課，伊買一堆寫字用品，講伊袂記得紮（tsah，攜帶）袋仔來貯（té，盛裝）；我的冊包內底拄好（tú-hó，恰巧）有一个塑膠購物袋，就予伊。伊說多謝，講若無這个橐仔（lok-á，袋子），宣紙、練習紙離離落落，坐公車一定袂好勢。

啥知影後禮拜，伊竟然提彼个袋仔來還我；閣摺做一个細細的三角形、足結實，會當做鏢來射矣。

我第一遍看人按呢整理塑膠袋仔。

頂個月，逐家閣去in（她）兜（tau，家）迌（tshit-thô，玩），厝內本底就有伊幾若項作品，山水畫和《心經》全文的篆刻；這遍，伊予阮看用剝皮樹（白千層）的樹皮創作的山水畫，和水泥做的花器。甚至也表演伊新學的本事──挨弦仔（拉二胡）。

竟然有人遮爾（tsiah-nī，這麼）有氣力！

然後，伊提我的台語冊《驚驚袂著等》予我簽名，講伊有認真讀；確實，看會出彼本冊真捷（tsip，頻繁）掀。「我攏囥（khg，放）佇眠床頭，一日讀一兩篇；台語，讀起來較食力，有時煞（suah，竟然）睏去。」

我講按呢足好，睏袂去的人會當來讀我的台語冊。

有這款認真的同學，我也有受著影響。這陣，我嘛會共塑膠購物袋摺做三角形的鏢；毋過，我的功夫較差，摺了無偌結實，射出去凡勢會佇半空中就散去。