文／劉靜娟

這个早起，天氣袂bái（差），阿貴佇line通知逐家去公園食飯開講，毋通去餐廳。

我回，「我會去，替我訂位。」

講心適的，去餐廳才著訂位。公園遐爾（hiah-nī，那麼）開闊，有桌仔、椅仔通坐，免錢。就近去買便當抑是去自助餐店選家己的菜，就會當「野餐」。有人閣會紮（tsah，攜帶）果子，咖啡，甚至梅仔酒。佇遐（hia，那兒），無「外食不入」的規定。

這个公園佇巷仔內，無偌大，毋過，樹仔足濟種，生態豐富。麵包樹、大葉欖仁、松、茄冬、竹、櫻攏有；坐佇樹仔蔭下跤，感覺和外面的世界有明顯的隔界。

樹仔是鳥仔的樂園，所以鳥仔也濟；粟鳥仔免講，客鳥（喜鵲）也不時出現，閣有毋知叫啥名的各種鳥仔。膨鼠也時常出來走跳表演。

佇彼个所在食飯，答喙鼓，吹風，看風景，實在是都市生活真大的福氣。而且，是興趣相倚（近）、講話投機的同學。為著欲做伙，逐家選社大的課，攏會選一節拜四的，書法、水彩、音樂欣賞等。有人的課佇早時，有人的佇下晡時；中晝就是「拜四食飯團」約會的時間。

這个時間真重要，有人講來上課是順紲（sūn-suà，順便）的，主要是來和逐家見面。

可惜，有時siunn（過於）熱，有時落雨，已經有兩三個月無去公園矣；這工，會當去遐大細聲講話，心情特別好。

當阮講甲嘻嘻嘩嘩的時，一个查埔人行倚來，講：「恁有緣按呢鬥陣，真幸福；毋過，恁有想過後出世（下輩子）會當閣按呢見面無？」

毋知伊欲講啥，阮恬恬看伊。伊講：「恁誠心直直念南無阿彌陀佛，後出世就會當閣再做伙。」

這簡單，阮歡喜接受，隨念阿彌陀佛，阿彌陀佛。毋過，阮講這个「密碼」無夠明白，愛縮小範圍，念「阿彌陀佛，拜四食飯團」，到時相認較快。

真心希望後出世，會當拄（tú，遇見）著遮的朋友，閣繼續這世人的緣分啊。♣