文/林宇軒
我親愛的家逐工暗暝
目睭看天色的表情趣味
下暗,時間是黑色的
等糞埽車慢慢行過來
敢若一个少女清氣的歌聲
佇遙遠的所在祈禱
毋免偌久,所有親愛的厝
攏會打開心內的門
提出百百款的塑膠袋仔
內底是一家伙仔今仔日的煩惱
處理好勢,著攏變成
年久月深的願望
上普通的家有上平安的日子
生活的工課結束了後
毋免閣操煩明仔載佇佗位
我親愛的少女,這個時陣
伊的歌聲閣猶未到隔壁路口
這馬,閣不需要共碗囥落來
小可代誌,阮閣有淡薄仔時間
會當啉一喙茶,呷兩口飯
配一屑仔嘸啥要緊的話
這就是我親愛的暗頓親愛的家