賺錢有影有艱苦，看別人逐工穿水水吹冷氣，佇辦公室規工食報紙看茶，阮著愛惦日頭中央曝乾，曝甲汗流散滴，嘴乾喉渴，身軀黑鬼鬼，真正是毛蟹看著倒彈、蝦ㄚ看著噗瀾，啊！無人欲睬阮啦！

啥人會甲意一個做工阿人？別人是妝甲趴哩趴哩，阮甘哪有臭汗酸味；別人是手不動三寶，阮著愛為三頓打拚賺錢；別人有父公通致蔭，阮是萬項愛靠自己，別人哪講著財產，攏嘛億來億去，哪有親像阮見領嘛彼兩仙錢，雖然人咧講「認真的男人最美麗」（國語），毋過阮有當時嘛會自卑，哪欲講著愛怪自己，是按怎當初時，未曉撿一個好額人兮家庭去出世？

講即咧講，人阮嘛真有志氣，作工課輸人毋輸陣，骨力兼打拚，煞落去頂真擱細膩，毋哪阮自己做了歡喜，頭家嘛對阮真滿意，下班轉到厝裡，人雖然累，但感覺真安心，阮雖然無讀若濟冊，未曉講什麼大道理，但是嘛知影流汗賺錢兮意義，用自己辛苦賺兮錢飼自己，飲水嘛甜。

逐工風吹日曝，嘛有好處喔，阮一年通天真少感冒，身體勇甲甘那牛咧，所以有當時阮嘛感覺真安慰，時機這呢壞、阮有頭路通好食，有薪水通好領，身體擱練甲這呢勇健，著愛覓咧偷笑阿啦！

無論按怎，阮嘛是會繼續認真打拚，無定著有一工，阮嘛會遇到一個甲意兮人，無棄嫌阮、肯陪阮食苦，阮嘛也當甲人仝款，有一個幸福快樂兮家庭，哪想到這，外面日頭擱卡大、天氣擱卡熱，阮嘛攏毋驚，將來人生哪有仰望、趁少年食淡薄阿苦嘛無算啥。

日頭下流汗、認真做工課兮彼陣人、佇咱咧怨嘆艱苦、生活歹過兮時陣，猶原惦惦阿做、無怨言，感謝他們兮付出，乎咱也當過著方便舒適兮生活，他們即是值得咱感謝甲尊敬兮人。