春秋時代，晉國內亂，有人用計欲害死大公子重耳，忠心正直兮大臣介之推為著保護重耳，連夜護送重耳出晉國，一行人著按呢過著流浪兮生活。

介之推盡心盡力照顧重耳，仰望有一工，重耳也當倒返晉國，做一個賢明兮國君，但是流亡兮生活遐呢艱苦，跟隨兮大臣有人忍受不著離開公子重耳，只有介之推猶原惦佇伊兮身邊。有一擺，他們佇樹林內底迷路，幾落工攏無物件通好吃，介之推著割自己兮大腿肉，煮肉湯乎重耳吃，重耳知影了後非常感動，流著目屎，毋知欲按怎來報答伊才好。

流浪十九年兮公子重耳，總算回國登基坐上王位，著是有名兮春秋五霸「晉文公」，當初時跟伊同齊流亡兮人攏受到封賞，只有介之推認為這是為人臣應盡之道，毋肯接受封賞，著甲伊兮老母隱居佇綿山。
 
晉文公想到當初受伊照顧甲支持兮恩情，報答介之推兮心情愈堅定，伊來到綿山想欲請介之推出來，但是，不管晉文公按怎呼伊兮名，伊都是不出聲，派擱卡濟人去走找，也是找無伊兮行影，有人獻計：介之推是一個孝子，只要放火燒山，伊毋甘老母嗆著煙，或者是生命危險，一定會趕緊出來，晉文公著會見著伊囉！

為著欲見介之推，心內著急兮晉文公，一時想無長，火燒綿山是為報恩，大火三暝三日燒無停，燒甲天反紅，滿山兮樹木花草燒甲光光光，介之推母子猶原無出面，大火燒煞了後，眾人才佇柳樹下找到介之推，兩母子抱做夥，神魂已經無倒轉。看到伊兮好意顛倒害死一個正直兮人，晉文公才知啊！這回真正是失打算，目屎流、心頭酸，心內兮話無地問：為怎樣甘願犧牲生命，嘛不肯接受國君對汝兮感恩？

人死不能復生，晉文公為著欲紀念介之推以死明志，就下令：這工全國禁火，寒食一工，是謂「寒食節」；第二年，晉文公擱帶領大臣去綿山祭拜，發現那叢柳樹已經發新芽囉，就將伊賜名，號做「清明柳」，這工也定為「清明節」。