一年四季，天氣上好是春天，景色上水是春天，心情輕鬆是春天，春天上好叨位去？

春天上好去看花：杜鵑鳳仙山茶，梅花桃花櫻花，山頂、路邊、厝前後壁，開甲滿四界，春風吹，春花滿天飛，飛向天邊、飛去海角：阮欲來去趨淘（玩耍），敢有人欲跟（˙ㄉㄨㄟ）？

阿嬤想欲跟花去，看花開，心嘛開，想著青春時，那時兮阮，著親像春天兮花蕊，遐呢香、遐呢水，雖然花開花擱謝，春天兮花園內，總是有阮美麗兮記得（ㄉㄧˇ）。

囝仔想欲跟花去，上愛是花香味，春天兮早起時，春光真溫柔，照佇籬啊邊，蝶仔蜜蜂笑微微，招阮同齊去──後壁埕、大樹下、田岸啊路、亦是魚池，攏有香香甜甜兮好氣味。

茶某囝仔想欲跟花去，春天兮花上快樂，逐工真功夫，抹粉擱點胭脂，想欲甲←參詳，借一點啊花粉，乎阮像伊遐呢水，人看人甲意。
少年郎想欲跟花去，春風一下吹，春花開甲滿滿是，大蕊小蕊姿勢迷人，花紅柳綠好色地，心內意愛兮伊，←敢對伊表示，滿園滿天兮花，乎我上好兮指示：送伊一束春花，代表我兮心意。

孤單兮人、傷心兮人、寂寞空虛鬱卒生氣──心情不好兮人，攏愛跟花出去，日頭軟軟、風微微，海岸彎彎、山青青，這呢水兮風景、這呢好兮天氣，心情應該放乎開，甲花相借問、跟花出去，出去走走看看，汝著知影──上好心情是春天。