行過長長兮海岸，平坦兮沙埔，有柔軟兮沙，面前是迷人兮海湧，甲人相對看，一層一層，一景一景，姿勢直直換，挨來送去是伊兮舞步，大聲喊呼（˙ㄏㄨㄚ）是伊兮歌聲。

對面是清氣惦靜兮山，青翠的樹木，開闊兮草嶺，不時飛來歡喜唱歌兮鳥隻；白雲真溫柔，徘徊佇山邊，講欲甲伊作伴，暝日相依偎，幸福末孤單。

日頭真勤快，逐工攏上敖早，穿一舒金黃色兮新衫，聽講是即嘛上時行，伊對山頂行到山腳，走去海邊散步，歸去跳落去／藏水覓，大聲對月娘呼（˙ㄏㄨㄚ），天氣真嘟好，海水末熱嘛末寒。

月娘笑咪咪，探頭出來看，日頭已經無影跡，滿腹兮心事，只好是講乎身邊兮天星聽，一世人兮仰望，著是欲甲日頭牽手行，親像白雲咧對待山，哪知命運無作主，黑暗兮天啊！敢也曾了解阮兮心情？

天星叫月娘想乎開，世間事攏是親像這一般，有人幸福，嘛有人孤單；有人痛苦，嘛有人快活，佇天頂自由自在，無牽掛，嘛卡好咧落海，感情受折磨。

受苦的人，掠準苦衷無人會知影，春去秋來，花開花擱謝，目屎，偷偷啊流；心，惦惦啊疼，只有等待──時間是針甲線，早一日填補受傷兮心肝。

若是知影天地嘛有情無定著心會放卡闊──心事放乎風去飛，痛苦準作一陣煙涯，來看海看雲，接近山，天星地閃熾，月娘光焱焱。日頭，逐工攏會出來，甲汝兮目屎曝乎乾。

甲咱，同齊去走找──心中那珣上美上美兮彩霞。