文／劉靜娟

透早去公園，看著一位六十外歲的太太咧搝*單槓，我行倚去，問伊是按怎來搝？伊講龍骨無好，疼的時搝搝咧就感覺較輕鬆。

自一位病友講伊十外年的坐骨神經疼落尾主要是靠搝單槓才好起來，我見若看著有人咧搝單槓，就會倚去「採訪」，問人是按怎會來做這種運動，有啥效果？進前拄著兩位老太太，攏講搝單槓有改善in的腰脊骨。一位聽講我腰脊骨脫*去、致著坐骨神經疼，講症頭和伊的仝款，講：「你聽我講，復健沒路用啦，吊這較有效，閣免開錢。」伊講伊八十二歲，逐日早暗來吊，前後幌；這陣罕得疼矣。

伊講的有合我的經驗，我去過兩間復健診所，電療，微波「深層治療」，倒佇搝腰床頂搝，也無啥效果。

佇YouTube 頂也看過物理治療師紹介搝單槓的好處，講徛咧吊，靠家己身軀下墜的重力比倒佇搝腰床搝較有效；所以，後生替我裝一枝室內單槓，隨時會當吊一下。

準做對腰脊骨無效果，上無也會當訓練手力才著。起先，我的跤無辦法離開地板，過一段時間，人才有法度吊起來，雙跤前後幌兩下。

可能信心無啥夠，佇公園看著有人咧吊單槓，我猶是會撥工倚去收集情報兼求證；愈濟人的成功經驗愈會當增加我的信心。

早起拄著這位太太嘛一日來搝兩回，逐遍幌二十下；停一下，閣再幌，攏總五六遍。伊予我看伊結趼*的手，證明伊誠骨力搝。

予我「採訪」著的人攏足熱心，無怪我囉嗦，侵犯隱私。早起這位太太閣真好禮，讓予我搝，講：「你慢慢仔用。」

講著敢若伊欲離開飯桌，叫我款款仔食。我笑起來，講我欲去買饅頭，伊才繼續「用」。



﹡搝（khiú）：拉

﹡脫（thuùt）：脫離

﹡趼（lan）：繭