文／劉靜娟

結婚了後，我uì（從）大家（婆婆）遐（hia，那兒）學著一寡和阮後頭厝講的無仝款的台語。

我講的是偏漳腔，大家講的是偏泉腔；腔口無仝，有時講出喙，阮會相看笑出來。

豬、箸、魚，台北講的音較輕；聽講是三峽偏泉腔。

我愛提來做例的是，我的囡仔去員林外媽兜（tau，家），討欲食tir-huih-kér，阿媽過一時仔才知影伊講的是豬血粿，共伊講，「你講的三音佮我講的攏無仝款；阮講ti-hueh-kué。」

我佮大家學著的是我以前毋捌（不曾）用的詞，毋是伊的腔口。

比論伊講家己的查某孫：「真野馬。」看我愣愣，伊解說：「一時仔就無看見人，敢毋是若野馬？」

阮的講法較囉嗦，「規日拋拋走，毋知閣去佗位矣。」

大家不時會講著「無捨施（bô-siá-sì）」。

孫仔哭袂煞，伊毋甘，講：「哪會哭甲遮爾（tsiah-nī，這麼）無捨施。」

逐日來賣菜的阿榮予貨車挵（lòng，撞）著，大家講：「真無捨施，聽講愛過規個月才有法度出門；一家伙靠伊食穿呢。」

原來無捨施是可憐的意思，起頭我掠做講人「無聲勢」。

蹛（tuà，住）隔壁的阿姑過來，對伊的阿嫂講的話時常是，「逐擺來，攏看你咧薅（khau，拔）草。」

我的大家回答：「罔做議量。」

大官（公公）的工廠佇附近，若有細項穡頭，大家食晝飽，就佇客廳加減做小工。伊也講：「罔做議量。」

聽幾擺，我才了解彼意思是，閒閒無代誌，罔消磨時間。

其實，欲消磨時間，伊會使看雜誌，看電視，抑是去揣（tshuē，找）阿姑開講；毋過，伊骨力，閒袂慣勢。尤其，一大片種韓國草的所在幾日無整理，就變做野草的地盤。大官誠重視花園，伊負責種花，大家負責薅草──雖然囡仔有時也會鬥薅，上要緊的猶是大家。草發siunn（過於）濟，大官講話淡薄仔「酸」，大家就愈拍拚薅。

頂輩的查某人囡仔濟，做一世人，一雙手攏較粗；大家的手指頭仔毋但粗，閣曲，敢若薑母；可能和伊定定出大力薅草有關係。

這陣，看著悲傷的新聞，同情發生事故的人，我心內講「真無捨施」；學畫圖學幾若年，猶畫甲不答不七（不成樣），想欲放棄的時，我共家己講，「時間冗剩，罔做議量嘛好。」♣