日頭猶未出來，打板兮聲音先甲我叫精神，鐘聲遠遠傳來，愈來愈近，愈來愈緊，目睭跋抹金，身軀先起來，坐好！坐好！叩鐘囉！清脆兮鐘聲是頭一←招呼。

上愛聽兮是鼓聲，一聲一聲，每一下攏打入心內，鼓聲愈打愈緊，心情著愈來愈安心，上好是一直聽落，上好是什麼攏抹記，抹記得佇這靜坐、抹記得身佇他鄉、抹記得過去、抹記得未來，抹記得──想欲放抹記兮代誌。

大殿早課已經開始，唸佛聲傳入耳邊，句句是佛陀慈悲兮教示，輕輕唱起，聲聲入耳，時間兮沙，慢慢啊漏去，流浪兮心，想欲走找失落兮過去，莊嚴兮音聲，聽起來歡喜猶擱傷悲，這呢熟悉、這呢親切的聲音，阮已經思念兩千年。

天色漸漸光起來，逐項活動當咧進行，出坡、上課兮是佛學院兮學生，文藝營兮宗旨是欲「寫一座靈山」，有一支會曉講話兮筆，就也當點起心中兮明燈，童軍團、青年團兮少年囝啊，是咱未來兮希望，純真兮笑容，使人回想起當初兮發心，如今已經消失兮熱情。東禪寺兮日時，每一個人攏真無閒，誤過住佇這，有一種鬧熱兮惦靜。

下晡時，烏雲慢慢偎來，天頂雨水會落來替大地洗土腳，熱情兮雨聲是油棕樹咧拍噗啊，好禮兮邀請，舉頭看，天頂彼呢光兮熾那（閃雷），雷公遠遠著大聲呼：「歡迎來到東禪寺，馬來西亞！」雷公甲雨水相約束，雙人合作，演奏動人好聽兮歌聲，歡迎有緣兮人，相招來到這。

（十一月，落雨期，我佇馬來西亞佛光山東禪寺，有一段美麗兮假期，慢慢啊講話、慢慢啊喘氣，換一種環境、換一種心情、換一種甲以前無仝款兮人生兮滋味。）