我住佇一個無聲兮世界，早起時，日頭惦惦來到我兮窗阿邊，暗時月娘靜靜送我入眠，風微微阿吹，雲慢慢阿行過，我兮一工，著按呢無聲無說……過去。

風無甲我講話、雲無甲我講話、雨無甲我講話、土無甲我講話、天星、樹阿、海湧、沙阿埔……攏無甲我講話，我干哪看著海湧咧跳舞、樹阿咧招〈iat〉手、雲咧散步、雨咧拍鼓、風咧玩、沙阿趴車輪、著是無人會甲我講話……

我兮身邊惦靜無聲，我無聽著爸爸好聽兮歌聲、無聽著媽媽叫我起床兮聲、無聽著弟弟叫我姊姊兮聲、無聽著阿公教我讀冊兮聲、無聽著阿媽講我乖巧得人疼、無聽著別人講我水、嫌我醜，嘛無聽著我兮朋友，大聲呼我兮名，我兮世界，親像一齣無聲兮電影。

我攏不知影：唱歌是什麼感覺？鑼鼓聲有偌鬧熱？鼓吹有偌好聽？撢雷公有偌大聲？逐工，一齣一齣兮電影，佇我面前搬，但是啊！有看著影、無聽著聲，我嘛無甲因講話、無論我兮親人、我兮朋友、不管熟識，亦是無熟識，我仝款是惦惦對待因，無問因會寒麼？會熱麼？有歡喜麼？傷心麼？佇這個無聲兮世界，我已經慣習用心、用情來關心因；用眼神、用笑容來照顧因。

因為我聽不著，聽不著風、聽不著雨、聽不著人講話、聽不著人唱歌，風來我未曉唱、雨落我未曉學；別人講話我未曉開嘴、唱歌我不知影高低音，所以，心內未當講出兮話，足濟足濟，唱佇心內兮歌聲，自來著無人聽過。

毋擱，我猶原真歡喜：世界雖然是無聲，但是媽媽煮兮菜真好食、爸爸兮手真安全、阿媽兮笑容真溫暖；看著月有圓、聞著花有香、感覺山有青、吹著風真涼、我了解天真高、知影海真闊。

我聽不著自己歡喜時兮笑聲，好佳哉！自小漢到大漢，我嘛攏無聽過自己傷心的哭聲！