天氣甲人仝款，心情定定咧變，有時歡喜、有時憂愁、有時流目屎、有時發性地，歡喜兮時陣著清風涼爽、憂愁兮時陣著熱甲走無路、目屎一直流就幾阿個月、發性地著雷公熾那、風颱大水，喝變著變、喝熱著熱。

熱甲走無路兮時陣，呷未落、睏不去，逐工歸身軀汗，到底欲作什麼？提冊來看，看冊上好啦！看冊兮時，毋免出腳手，不熱；毋免開電視，未了電；擱毋免看新聞生氣，省體力；嘛不想欲甲燒甲冷，毋哪省錢擱未大箍，免減肥；書看落去，什麼代誌攏不記得，管伊天地幾斤重、睬伊民國幾年，省電省錢省體力，知識增加、學問擱好，上重要兮是──著不知影熱啦！

心情無好兮時陣，看什麼攏不順眼，嫌吵嫌熱嫌電視歹看、嫌飯歹呷嫌菜煮相爛嫌厝小間嫌隔壁唱歌歹聽、嫌親戚無情朋友無義嫌人緣無好囝仔無乖老師●曉教，嫌環境無好錢歹賺路歹行公媽無保庇政府無才調，台灣喔！哪也這呢歹住！啊這日子實在過●落去，到底是欲按怎？來讀冊啦，找一本有意思有趣味兮冊，慢慢啊看、逗逗啊欣賞，看到好笑兮，著笑笑咧，心情著無仝款喔！哪無，找一本風景美建築特殊兮旅遊冊，那看那看，著●記得操煩，心著飛出去囉！

上界好是找一本有深度有思想，會乎人冷靜思考兮冊，學別人看事情兮角度，對待人的態度，看別人兮悲、體會別人兮苦，無定著，自己兮心情會卡開闊，對這個世間有擱卡濟兮期待。

一年四季，有寒有熱；長長兮一生，有歡喜有悲傷，人生，著親像一本冊，少年到老，愛寫一世人，寫好寫歹攏是自己兮作品，看自己寫兮冊，嘛愛看別人寫兮冊，看自己兮心情，嘛關心別人兮歡喜甲悲傷，有時，會感覺自己是一個幸福、富裕兮人。

無論天氣寒熱、局勢好歹、年紀大小、心情按怎，這也時陣上好是──大家作夥來讀冊！