文／妍音

雖然我知影我的生命是按媽媽遐來的，毋過我從來毋捌斟酌去思考我的生命活水對佗位來？

自從我會行會走了後，我就袂記得是因為媽媽，我才會一日一日長大成人，嘛是因為媽媽的栽培，我才會當讀到大學畢業，食好頭路嫁好翁。

一直到媽媽人生最後這幾年，因為接媽媽落來蹛踮高雄，逐日透早我去小弟的厝陪伴媽媽，才閣一擺回頭去看我佮媽媽的關係。

我才清楚，我一年一年活甲好勢好勢，活甲真精神有光彩，是因為我生命內底有源源不斷的活水，這个活水其實是按媽媽遐來的。

熟悉我的人講我真骨力真拍拚，我的老師我的朋友我的姊妹我的囝兒信任我，這是因為我自細漢看著我的媽媽按呢做人，無意中我嘛學著矣。

媽媽是我一个學習的見本，我是我的序細學習的對象，生命一代一代傳落去，好的品行嘛相連續代代相傳。

這是生命，這是血脈，這是活水。

血脈的活水點點滴滴攏存在，雖然看伊袂著，毋過真正感受會著。

就親像大高雄地區的民眾，無定著有人毋捌來過大貝湖，可是逐日攏脫離不了大貝湖，因為大貝湖供應著高雄市民的生活用水。高雄人趣味樂觀，高雄人快樂熱情，高雄人大腹腸相挺，這敢講毋是因為高雄有一个大貝湖？

日常有活水，生活過了就快樂；四季有活水，日子過了就趣味；年年有活水，民眾當然是樂觀矣。

結婚了後戶口遷入來高雄，我接近大貝湖的機會無濟，彼時嘛無去想著生活的源頭活水是按大貝湖來的，一直到因為陪媽媽，我才有機會逐日看著大貝湖，才想著過去看待大貝湖傷過理所當然，完全袂記得愛感謝大貝湖。

抑就是佇這个時陣，看著媽媽愈來愈虛弱的身體，雄雄才覺醒，媽媽一世人為家庭為囝兒付出，用伊的心血補充阮的活水。

我深深感謝，我的媽媽。

雖然媽媽已經往生矣，毋過媽媽的血猶原佇我的身軀流，彼是我一生的活水。♣