文／崎仔頭赤子

田庄跤 綠水波
來圳溝邊 你洗衫我洗浴

浴池水放甲滇滇滇
囥一寡仔𨑨迌物
若像鴨咪仔咧泅水
呱呱拍滂泅
泅甲沓沓滴滴

佮你食飯啉茶水
教你唸冊歌算數字
規工不時笑微微
厝邊兜講你變甲真古錐
放下五花十色的性情
百百款的好玄
拋拋走咧囡仔性
行一步綴一伐
褲頭結相倚

來洗魂舒
這馬煞愈來愈幼囝
無愛行路啊
無愛講話
無愛鴨咪仔
來來來
洗盪一生的鹹酸苦汫
單純做一个紅嬰仔
予阮倚你身軀邊 呱呱
叫甲歡歡喜喜

註：「洗澡」的台語大部分講「洗身軀」、「洗浴」。「洗魂舒」是宜蘭特有腔調。♣