文／蔡婕馨

佇COVID-19猶未出世的時陣，聽著人驗著兩條線，講是有矣，身邊較親的親情朋友攏嘛綴咧歡喜，sueh「恭喜喔！」毋過厝裡的序大就會交代講：「噓──慢且四界放送，三個月後才通講」。

2019年年尾COVID-19無人請家己來，紲落去閣湠甲全球逐國都無伊法。平常時慣勢自由自在的生活，就按呢捙跋反袂平靜。若無細膩去hőng穢著，驗著兩條線，講是確診矣，防疫單位就會交代講：「謼──趕緊自我隔離莫和人接觸」。連工課場所，有相閃身的生份人嘛愛綴咧匡列踮厝裡隔離，予無形的病毒觸纏袂煞。驗著兩條線，輕症是暫時隔離用犧牲自由來交換兼保護身軀邊的人；萬不二去著重症是有真懸的機率會去蘇州賣鴨卵喔！千萬毋通傷大意。

平平驗出兩條線，待遇卻是天差地咧，驗著有身是喝恭喜，驗著確診換身體虛。莫叫是講解隔離矣就完全恢復健康，根據統計袂少確診過的人攏有帶淡薄仔症頭，抑就是會留一个病母，愛侹真久身體才會沓沓仔復原，有的是會好嘛袂完全。

時間來到2022年11月矣，新冠肺炎對世界的影響已經超過三年，越頭看這三年莫講別國就講咱台灣就好，咱的經歷有：第一改拄著愛分雙奇數紮健保卡排隊領喙罨、搶買衛生紙、共歇熱先撨15工來接歇寒。想袂到疫情仝款雄閣猛擋都擋袂牢。病毒狡怪閣多變，咱嘛一直滾動式的修正，頭一改線頂課程大人囡仔操甲強欲接載袂牢，成做有史以來上長的歇熱，學生囡仔暢甲、大人忝甲。雖然病毒無情，毋過台灣人上有情，有真大的腹腸，MIT喙罨用飛行機送出國，予全世界攏知影「Taiwan can help」，台灣會當鬥相共。

三級防疫警報霆，全國人民掣咧等；

調整方法毋驚慢，同心協力著靠咱。

紲落去誠無簡單，咱有疫苗通注矣，按照職業、年齡，分批去注疫苗，咱會領著一張記錄疫苗的黃色卡片，健保卡面頂嘛會共貼貼紙，方便記錄。為著日常生活全民開始收集彼个注過疫苗的印仔頓落來的證明，通自由出入公共場所，無論是上班抑是予醫生看就毋免撞鼻空。想袂到病毒愈來愈毒、愈來愈gâu穢，一个失覺察，咱姑不而將閣愛面對第二改的線頂課程，佳哉！有第一改的經驗做基礎，第二改就加真順利矣！落尾因為線頂會議、講習課程，無需要另外安排交通和場所的利便性，顛倒予真濟人愛這款方式，這應該是予人料想袂到的結果。

三年矣，若佮COVID-19同齊出世的紅嬰仔，這馬就會當讀幼兒園囉！既然病毒袂消失，咱著只好和伊共存，世界各國防疫的規定愈來愈冗，管制嘛無遐嚴格，閣免偌久，咱台灣佇室外就會當毋免掛喙罨矣，這嘛是咱恢復自由愈來愈有希望的政策。自從COVID-19侵門踏戶出現佇台灣了後，掛喙罨變成全民運動，出門上基本的要求，大大細細攏仝款。咱因為掛喙罨失去的表情，就得欲會當轉來囉！

COVID-19來到後疫情時代，世界咧變咱嘛咧變，天袂一直烏雲罩頂，雷公爍爁摔大雨的歹天，已經漸漸仔停矣，紲落來就等待雲開日出，繼續向有光的方向行過去。人生難免有意外，若拄著，毋管是意外的驚喜猶是意外的確診，驗出來的結果雖然是天差地咧的兩條線，毋過莫驚惶，咱攏愛有向望，相信未來絕對會閣較好。

堅強行過疫情，賰使人期待充滿希望彼種兩條線。