文／妍音

對海，我有一種講袂出喙的欣羨。

猶未來高雄的時，我因為自出世佮成長攏佇台中市，大海離我的生活真遠，囝仔時代爸爸媽媽無閒顧三頓，毋捌帶阮去海邊仔。對水，上深的印象是台中火車頭前彼條綠川，佮我細漢時一日到暗攏看到的柳川，閣有，就是戀愛時約會的台中公園的日月湖。

毋管是綠川抑柳川，或者是公園內底的日月湖，攏才一點仔水爾爾，我的眼界欲按怎會開闊？

彼時的男朋友（這馬的翁婿）定定講南部屏東的海偌大閣偌大，就是按呢共我心內對大海的幻想撓起來，我才會想欲看無邊的海生做啥款。

好佳哉，大學上尾彼年，媽媽服務的銀行半島旅行，對台中出發沿路耍，然後遊覽車開到基隆，所有的人佮遊覽車攏坐去花蓮輪（台鐵北迴線通車了後，拚袂過競爭，民國七十二年四月停止定期航運），遐大隻的船佇太平洋面頂搖甲足厲害，我亦吐甲規身軀軟荍荍，只好放棄感受世界第一大海洋的機會，規个航程攏倒佇船艙內的眠床頂，這馬回頭想起來真正可惜。

我袂暈車煞會暈船，實在真奇怪。

畢業了後我留佇學校做助教，減我一屆的學妹畢業旅行的時我一路陪伴，環島以外，閣去綠島佮蘭嶼。坐船的時我仝款吐，這擺真緊遊過綠島隨就去蘭嶼，海上的路程卡短，無爽快真緊就過去矣。彼一暝歇佇蘭嶼，日時的海、暗暝的海我攏有看見，我的眼界嘛按呢打開真濟。

有一句話講「老王賣瓜，自賣自誇」，彼時的男朋友佇我分享東部旅行，講完對花蓮佮台東的感受了後，一直替伊過境三年的高雄（伊讀雄中）講好話，伊講高雄是大海港、是工業都市，市區的路攏真大條，路名閣有按一排到十的特色，而且港口有真大片的海岸。

佇彼時，伊講閣遐爾仔濟，坦白講，我對高雄猶原一點仔概念攏無。

一直到我嫁來下港，了後佇高雄買厝，戶口設入內高雄了後，我才開始拍開目睭熟似高雄的海。

初初來高雄，先生帶我坐渡船仔去旗津，我頭一擺看到茫茫無邊的大海，嘛頭一擺無暈船一路搧海風。

我真甲意一條台語歌〈相思海〉，有一趴歌詞是按呢的：

「海面茫茫相思海，茫茫失東西，阮是思君君袂來，搭心今何在？今何在？

今何在？今何在？啊！海鳥替阮做花使。」

我是海鳥花使牽線牽了真好，我佮先生有圓滿的結局，彼種茫茫相思的感受毋捌有，毋過歌我是真愛聽。

我想人若鬱卒，只要向海面金金看，開闊的大海可能有一種特別的力量，無定著會予人心胸雄雄就打開，甘苦的結免用雙手，自然就掏開矣。

我敢捌鬱卒去看大海？

這是祕密，哪會當共恁講！

有人是歡喜快樂的時去海邊踏沙踏海湧，我有可能嘛是這種人喔！

高雄是一个一直有好名聲的港都城市，海景當然無欠，尤其是西子灣的景色，真濟人愛欣賞。

我佇民國七十一年秋天來到高雄，彼時若欲去海邊，除了先生騎歐兜麥抑是開車，另外我干焦會當坐公車轉公車。

這馬，高雄有了橘仔色的捷運，欲去海邊就方便濟矣。

定定我坐佇捷運的車廂內底，一站一站快速到站閣快速離開，我攏強欲忍袂條想欲開喙唱歌。

毋過，我猶無遐好膽，踮公共場所就來唱歌。

捷運開了真緊，我想起有一條台語老歌〈港都夜快車〉，歌曲的旋律真正輕快迷人，雖然是一首離別的歌曲，毋過並沒哀愁的心情。

這首歌描寫的過去干焦有台鐵的時，暗暝坐一班按高雄開出去的快車的心情。

我這時，干焦是想起來爾爾，並無其他的想法。

假使汝若願意，請共我作伙欣賞一咧這首由呂嵩甲先生作詞、劉清池先生編曲的〈港都夜快車〉。

「闊闊的高雄港，無限美麗的夜景，依依難捨的心情，離別夜港邊，海風也陣陣吹來，來給我相送，海鳥也找無伴塊叫聲，啊……我的故鄉，可愛的姑娘，暫時離別愛保重，港都夜快車。

美麗的高雄港，充滿人情的城市，依依難捨的情景，離別夜都市，霓虹燈 閃閃息息，要送我離開，有聽見迷人的歌聲，啊……我的故鄉，可愛的姑娘，暫時離別再會啦，港都夜快車。」

無定著是佇我細漢的時捌聽過這條歌，所以才會共伊記遮清楚，我毋是職業歌手，無可能唱甲像有真濟登台經驗的歌星彼款，毋過我是真正對心肝內誠懇咧唱這條歌，因為闊闊的高雄港，有滿滿的人情，有無限美麗的景致。

來到高雄遮濟年了後，對海，我有滿心的歡喜。