文／劉靜娟

朋友in翁嫌咧欲懸（高）過牆圍仔的兩欉（棵）樹仔有刺，朋友嘛感覺樹型無啥媠，規氣（乾脆）去買兩欉旺旺樹來替換；希望日後一家會旺起來。

樹仔種落去無幾工，一个對風水有研究的朋友來，講新樹袂，「啊舊樹仔挖走時，你有共伊說明無？」

說明？

「種四五年的樹仔有靈性矣，無愛伊，共伊講幾句仔好話，較好。」

朋友講彼日賣樹的人送樹仔來時，挖舊樹，種新樹，一貫作業，順順利利，根本無想遐爾濟；tsit-má（現在）聽著這款講法，一時煞對彼兩欉樹仔袂過心起來。

我笑起來，「這是關係著迷信抑是禁忌？規矩遐爾濟，日子歹過啊。」

過一時仔，我安慰伊，「不知者無罪，以後拄（tú，遇）著仝款的情形，照做就好。」

我想著做囡仔時看媽媽刣雞，攏會聽著伊佇喙內「念念有詞」，我kan-na（只）記兩句，「做雞做鳥無了時，後出世（輩子）去做好額人的囝兒。」我心內想，「照按呢講，kah我仝班彼个醫生仔囝和開百貨店的同學敢是雞出世的？」

聽講tsit-má的人，刣畜生毋是念這款咒，是念往生淨土咒。

我閣想著一年和阿賓去峇里島旅行，一路看風景抑是看櫥窗時，一定愛注意塗跤。因為峇里人每日共簡單的供物──飯粒、餅、一屑仔菜，甚至一張銀票貯佇椰子樹葉編的「碟仔」內，囥（khǹg，擺）佇桌頂、門前石雕頂抑是塗跤；行路無小心，著會去踢著，踏著。

in啥物攏拜，自然界的石頭、樹仔，和生活用品電鍋、跤踏車、機車等等；拜，是表示感謝。我共一个峇里人講恁需要拜的對象愈來愈濟，電視、電腦、手機也著愛拜啦，伊講對啊！

對啥物攏感恩，人佇天地萬物面前可能會較慈悲、謙虛才對。

所以，對咧欲離別的樹仔講話，毋是迷信抑是禁忌，應當是一種溫情。

毋過，挖樹仔時，共伊講啥較適當？「共你徙走是不得已，希望你會拄著有緣的人，共你種佇有開闊所在的大花園內」？至少，應當共伊講再會吧。

彼遍 峇里島旅行轉來的飛機頂，我共阿賓講咱應該好好仔感謝一路替咱服務的水杯，伊笑容古錐，雙手合十，正經對伊的杯一拜。