文／崎仔頭赤子

少年櫻花一片一片的瓣咧欲墜落
在夢中你一直流目屎
我行到奈何橋頭
雙跤突然間徙袂振動
託夢予你
共你講蹽過河水的淺岸
化成佇彼岸你隨身旅行的一枝拐仔
──神風特工隊 高田豐志〈遺書〉

空襲警報喔！
阮阿媽聽甲身軀軟膏膏
跋落來眠床跤
阮阿公驚甲心酸酸
爬去覕尪架桌跤
彼陣的代誌，漸漸袂記得
空襲警報喔！

神風飛行機的阿母
半圓 硞硞
血參淚攪紅毛塗糊甲彼呢厚
思源機堡
藏佇麻竹林
面頂歇一隻竹飛機
內底囥一寡仔古早物
春天百人栽樹欉
熱人同齊挖竹筍
九九重陽敬序大
冬節思源謝平安

老大人的奶母，佇遮
破豆唱歌畫尪仔
繪出黃昏的色水
跳舞挵鼓流汗水
健康活力食百二
每一个一本故事冊
共宜蘭寫甲誠腥臊，講甲軁軁長
向望你，耐心定定掀

竹田嬰嗡嗡嗡 — 嗡甲
1945年的5月31
霆水螺炎甲猛猛叫
共伊燒甲臭火乾
宜蘭大爆炸
按怎，米國仔

神風飛行機真風神
頭包白布
食飽飽相辭機堡，行到機場出張所
惜命命我老母，『さようなら』
飛過龜山島，飛向太平洋
風神少年兄，按怎
心肝像日頭，目睭像大海
轟隆轟隆
衝懸懸，沖低低
轟轟烈烈
航空母艦窟窿窟窿
一逝天皇，二个世界

沖天炮彈過101的頭殼頂
按怎，大陸仔
防空演襲喔！
街頭冷清清
轟隆轟隆飛行機
跤手冷吱吱
歷史毋通袂記得
戰爭悲劇這齣戲
毋通，起鼓

註：機堡為機場掩護飛行機，停放飛行機的軍事設施。思源機堡內底囥竹飛機佮古早物，由宜蘭市思源社區發展協會管理，該會抑是長照據點，每年舉辦四季的文化活動，春季「社區植樹節」、夏季「宜蘭市麻竹筍文化節」、秋季「宜蘭市古文化重陽敬老節」、冬季「思源社區謝平安文化節」。社區耆老講：「13歲時讀公學校，當時的台灣學生囡仔，攏會被徵召去做竹飛機。竹飛機的尺寸，比照神風特攻隊戰機的外觀、機頭、機身、 機翼、機尾，分別製做；再由日本兵收集、組裝完成。」扮演欺敵作用。